PASAMBAHAN MAANTAAN KAPAN

                                               ======PASAMBAHAN MAANTAAN KAPAN======== 

Angku datuak ...... ! NAK BARUNDIANG AMBO SAPATAH JO ANGKU DATAUK ...

Sambah manyambah kito pulangkan kapado ALLAH, salawaek kito ucapkan kapado RASUL ...  Parundiangan ambo tibokan kapado angku datuak ...

Panjang bakarek singkek baambiak ... Singkek tibono ka angku datuak.

Maagak’i dihari nan sahari nangko, Malang ndak dapek diraiah mujua nan ndak dapek ditulak, Singkek palapah panjang dalido singkek langkah panjang tapinto. Lah bapulang karahmatullah urang tuo/anak kamanakan kito, mangko barhimpunlah anak bapak, karik kabiah, ipa jo bisan sarato buek arek karang nan badagok mambaoan nan sapanjang adaek.

Maa nan sapanjang adaek ....

 Rokok nan sabatang,siriah nan sakapua. Balaia lah sampai kapulau bajalan lah sampai kabateh, limbago nan batuang cupak nan baisi jo urang nan bakarik jo kabiah mambaoan nan sapanjang adat. Mati bapak bakalang anak, mati anak bakalang bapak mambaoan kapan nan salampih . Adat jo kapan nan katangah mintak ditarimo jo muluik nan manih jo hati nan suci .... Sakian sambah diantakan sampai kabakeh angku datuak .....

JAWEK ......

Manuruik parundiangan angku datuak nan tibo katangah nan sampai kabakeh ambo, dikito nan baadok adang bana lai kasampai paham lai ka saukua, tapi sungguahpun baitu nan kayo kato baiyo nan bana kato mufakaek, dibao kato angku jo mufakaek kasilang nan bapangka karajo nan bapokok  kaurang sapuluah salingka duduak, lai manuruik adaek duh angku datuak ...?

“Bao lah kato jo mufakaek, mananti kami angku datuak ....”

JAWEK SIPANGKA .....

Maagak’i dihari nan sabanta ko , parundiangakn angku datuak nan tibo kabakeh ambo, kato lah dibao jo mufakaek, rundiang lah dibao jo baio, nan kajadi buah jo bari dari silang nan bapangka karajo nan bapokok, dikapan katangah yo kabatarimo jo muluik nan manih hati nan suci. Tapi sungguahpun ba itu .... kampuang kok baonggok nagari kurang siang bak hari kurang tarang bak bulan nan mambao minta ditarangkan ....

JAWEK NAN MAMBAO ...

Kurang siang bak ari kurang tarang bak bulan .... nan mabaokan nyo anak/cucu di pandan angku datauk .....

JAWEK NAN MANARIMO ...

Dikapan nan katangah lah batarimo jo muluik nan manih jo hati nan suci .....

Manuruik pasa nan biaso painyo batampek .... isi lah tingga nan tampeknyo yo kambali ka angku datauk ....

MINTA MAAF SUDAH MAANTAKAN KAPAN .....

Angku datuak .....

Nak barundiang sapatah lai ....

Nan ka jadi buah parundiangan kabakeh angku datuak , panjang nan bakarek singkek nan bapakai basingkek singkek sajo tibonyo ... Samaso hiduik, panjang jalan banyak nan nampak, lamo iduik banyak dirasai, Sunah dari nabi utang kito manjalani, kami nan sabondong lalu saganjua suruik minta rila jo maaf kabakeh ahli waris nan tingga.

JAWAB .....

Rila gadang faidah, maaf gadang harago .... tapi dek kami ado duduak jo urang sapuluah salingka duduk sarato ahli waris, ambo bao kato baio jo mufakat lai ko manuruik adaek jo pusako ....?

.......

Lah ambo bao kato angku datuak tadi baio jo mufakat jo urang sapuluah salingka duduak sarato ahli warih, mako dapeklah kabuah barinyo ... Rila gadang faidah maaf gadang harago ..... itu lah kabuah barinyo angku datuak ....

MINTAK KAPULANG MAANTAKAN KAPAN ....

Dirangkak nan malarai, diratok nan bapujuak, rasonyo bajalan lah sampai kabateh balaia lah sampai kapulau ..... Pihak kami nan tibo dek wakatu alah tibo/ jalan 2 tarantang, duduak nak maurak selo tagak nak maasak langkah mintak dilapeh jo muluik nan manih hati nan suci. Sakian parundiangan ambo tiboan ka bakeh angku datuak ....

                                            =========================================