Minggu, 01 September 2013

Balain batuka sabuik, sairiang balain jalan

Dikarang oleh : N. I. St. Sati 
Indak lamak bajalan surang-surang ka Palanta Mak Sati mako di bawah inisiatif Sutan Bandaro anggota diskusi bakumpua di RM Harapan Bundo Simpang Sekip Palembang.
Limo urang nan bagehe-bagehe, St.Bandaro, Sutan Sampono, Ajo Udin, Kari Marajo dan Dt. Garang barencana mintak pandapek Mak Sati tantang Pilpres Putaran II.
Nan lah sudah sagalo pandapek Mak Sati ditarimo aka. Runguih Sampono sambia maiduikkan masin oto.
Kini caro itulah. Dangalah beko. Tingkah Sutan Bandaro.
Sapuluah minik, oto lah parki diadok an Apotek Tradisional nan sakaligus manjadi Palanta Mak Sati.
Mak Sati tampak sibuk malayani langganan nan mambao resep Dr. Agoes.
Asalamualaikum. Sarangkek romboangan manyampaikan salam.
Sambia maengo, Mak Sati manjawek salam. Alaikum salam.
Silakan, Ambo sibuk sabanta. Si Usuik lai, kok nak minun sarobaek bagai.
Rombongan nan balimo tadi lah duduak. Labiah bataratik dari nan biaso.
Tampaknyo mamasang siku-siku nak mananyoi Mak Sati.
Datuak Garang jo Maruhun Sipado manggabuang ka Palanta sausai maambiak resep rematik.
Kini lah batujuah tamu Mak Sati di Palanta.
Sabanta Mak Sati masuak, langsuang ka kurisi tampaek baliau biaso maleseang.
Kasempatan tu digunokan Kali Marajo sabagai Jubir.
Macam ko Mak Sati
Apuang-apuang si tinjau lauik
Tampak nan dari gudang garam
Untuang kami bak limau anyuik
Alun batantu tampaek diam
E. e. eee.. Itu ranyah iduik tuan-tuan kini tu.
Iyo, biasonyo urang lupo dek lamo, urang ragu dek banyak.
Tapi nan tibo di kami kini balain Mak Sati.
Katiko balimo indak ragu, tapi lah tingga duo baru ragu
Mukasuik tuan-tuan tantang pemiliahan presiden.
Iyo itu bana Mak Sati, sarangkek balimo manjawab.
Macamko Kali Marajo. Sagalo urang nan amuah bapikia, patuik ragu. Nan indak ragu urang andia, urang cadiak buruak, dan sajinihnyo.
Simak elok-elok!, Mak Sati mulai basurah.
Mak Sati ko memang pantang dicukia, .. ajo Udin marunguih. Barang ko ado duo, kaduonyo samo kualitet.
Kok gagah samo gagah. Kok gapuak-samo gapuak, tando kalabiahan gizi.
Indak co di Sumbar do, banyak tabarito bayi nan kurang gizi, nan perkembangan utaknya berakibat kurang pulo.
Indak ado prestasi pelajar awak dari Sumbar kiniko.
Mako susah nak jadi presiden di maso nan akan datang.
Labiah baiak urang Sumbar tu, sibuak mamikiakan gizi, tampek sabagian urang Minang badiam, daripado batangka soal siapo nan ka dipiliah.
Calon tu kok buruak, samo buruak.
Kaduonyo ado kalabiahan.
Caceknyo samo banyak pulo.
Papatah urang awak mangatokan, SIKUA CIGAK, NAN SIKUA BARUAK.
Samo pandai mamanjek, samo makan mancapak, sarik dipicayo.
Kok lah panjang saiangnyo, hati-hati, awak nyo gigik.
Inyo lupo, awak nan maagiahnyo makan.
Kini baliak ka presiden.. Danga elok-elok !.
Awak nyio presiden sipil, sayang inyo padusi.
Awak ingin presiden laki-laki, sayang inyo bakeh tantara..
Jadi, LAIN NAN DI ATI, TAPI INDAK SAKANDAK ATI, DAPEK NAN SAKANDAK ATI TAPI INDAK NAN DI ATI.

Baa kini. Silakan Indomo!
Pandapek Ambo, ditinjau dari segi karik-baik awak jo calon presiden dan calon wakia tu..
Capres nan padusi tu, bini mamak awak; bini Mak Datuak Basa Batuah nan banamo Taufiek Kiemas dari nagari Andaleh Sabu, luhak nan tuo Tanah Data.
Cawapres nan ciek lai, urang sumando awak dari Lintau.
Kaduonyo taka-ik jo awak.
Jadi awak manonton sajolah, karano sia juo nan tapiliah awak sato manang.
Manonton, itu Golput namonyo!
Urang Minang indak buliah Golput, kato Mak Sati.
Giliaran Kali Marajo.
Kali Marajo mamburigik...biyai awak calon PDIP,... urang Sumando awak calon Partai Demokrat. Itu samo.
Balain batuka sabuik,- sairiang balain jalan-. Bak papatah urang awak:
SIKUA ALANG,- NAN SIKUA SIKOK.
Samo bakapak pandai tabang, samo-samo panangkok ayam..

Bisa abih ayam awak dek inyo, tingkah Bandaro.
Kakurangan, jawab Mak Sati.
Balangko se lah awak..
Jan, jan, Itu Golput juo namonyo.
Urang Minang ndak buliah Golput, kecek Mak Sati.
Awak danga pulo pandapek Ajo Udin.
Di awak, jantan batino sagalo alahe samo je nye.
Sajalaeh-jalaeh he baruak jantan awak bali di Piaman, tibo di Kuraitaji mambang je lencik e (mambang=bundar merah).
Aratinyo, baruak ajo Udin dituka urang jo baruak batino di ateh ksreta api, St. Bandaro maejek. Jadi indak usah kito sato mamiliah.
Indak sato mamiliah Jan.. jan. Itu Golput.
Urang Minang indak buliah Golput. kecek Mak Sati.
Manuriak Buya Hamka, nan disabuit urang Minang tu, salah satu syaraitnyo iolah mengakui NKRI sarato mengikuti peraturan-peraturan undangnyo
kalau golput aratinyo awak indak takah WNI nan lain.
Kini awak danga pandangan Maruhun Sipado, Mak Sati manunjuak Maruhun Sipado.
Ambo maninjau dari segi adaet, Maruhun Sipado mambuka kecek.
Kalau bini Mak Datuak jadi presiden, itu lah samo jo Mak Datuak manjadi presiden.
Nan paralu yakini (pareso !!) Mak Datuak awak dulu.
Inyo harus bak kayu gadang di tangah koto. Batangnyo gadang tampaek basanda, dahannyo kuwek tampaek bagantuang, buahnyo labek dapek dimakan, daunnyo rimbun tampaek bataduah.
Nan kaduo, Cawapres, urang Sumando awak.
Pareso dulu, lai koh inyo urang sumando Inyiak-mamak,. kok kusuik ka manyalasai, kok karuah ka mampajaniah. Jan inyo tagoloang urang sumando nan ampek parakaro.
Urang sumando langau ijau, (sudah makan uleknyo tingga)
Urang Sumando kacang miang (galigato urang dibueknyo)
Urang Sumando lapiak buruak (legoh-pegoh di rumah, lupo mancari)
Urang Sumando apak paja (Cuma elok ka tampang)

Kok lai, mamanuahi syarat, awak cucuak kaduonya. Jan..jan.. itu tagoloang Golput juo.
Urang Minang indak buliah Golput..
Jadilah. Kini awak mintak Datuak Garang mangamehi..
Asalamualaikum ww.
Mak Sati, nan ditinggikan sarantiang, didahulukan salangkah.
urang nan cadiak candokio, pusek jalo pumpunan ikan, urang nan arih bijaksano, pandai maagak jo maagiah, tau di ereng jo gendeang, tau diribuik ka mandingin, tahu diombak kamaampeh
Kilek baliuang lah ka kaki, kilek camin lah ka muko, lamak makan di kunyah-kunyah, lamak kato di pakatokan. Kini lah dapek bulek nan sagoloang, lah dapek picak nan satapiak
Namun samantang dek baitu, ambo urang mudo matah, ilmu kurang pangalaman senteang, pandapek indak sakali tibo, pikiaran indak sakali datang. Kok satitiak toloang lauikkan, saganggam toloang gunuangkan.
Kasimpulan ambo sabagai barikuik.

Jan masuak golongan Golput.
  • Gunokan ati nurani, jan bak ayia di ujuang pulau, tajun kehen dareh kamari.
  • Kualitas calon samo, satali tigo uang, ciek kampih, nan ciek kimpuih.
  • Kini, ateh namo nan basamo mintak nasihaek Mak Sati nan ka dipacik arek diganggam taguah oleh pemilih, labiah-labiah kapado nan tapiliah. Silakan, buliah dicatek dan tolong sampaikan ka kaduo capres.
    1. Hati-hati
    Pacaringek jo batang kapeh
    tumbuah sarumpun jo batang dadok
    duri nan tumbuah tiok tangkai
    tampuo basarang tantang bania
    Ingek-ingek nan di ateh
    nan di bawah kok maimpok
    tirih kok datang dari lantai
    galodo kok datang dari ilia
    Gabak di ulu tando ka ujan
    cewang di langik tando ka paneh
    2. hindari sipaek kianaek:
    Tantara Pusek pakai karaben
    Manembak di Balai Akaek
    Kok tapiliah awak jadi presiden
    Jan dipakai sipaek kianaek.
    Manuhuak kawan sairiang, mangguntiang dalam lipatan
    Malakak kuciang di dapua
    Manahan jarek di pintu
    Pilin kacang nak mamanjek, pilin jariang nak baisi
    Mancari dama ka bawah rumah, mamapeh dalam balango.
    3. Inyo mesti mangarati pantun nan di bawah ko kalau nak mangatur urang awak pulo
    Batang aie di Sicincin
    Ulunyo ado di tangah rimbo
    Di dalam lahie tasimpan batin
    Di dalam batin bahakikat pulo
    Assalamualaikum warahmatullahi wabarakatuh.
    Salasai sumbayang luhua, romboangan lanjuik badamini.
  • Tidak ada komentar:

    Posting Komentar